Деби-албумот на македонскиот кантавтор и мултиинструменталист Иван Кукиќ насловен „Sunday vibes“, објавен под закрилата на „Кроација рекордс“ (Croatia Records) својата скопска промоција ќе ја има в сабота, 23 ноември, во 13 часот во „АудиоКултура“.

За таа прилика Иван подготвува и мал акустичен концерт, со своите најблиски соработници.

Самиот албум содржи 10 песни, од кои две се веќе промовирани како синглови: „Балада за една љубов“ и „Друмови“.

Иван Кукиќ е авторот кој стои зад најголемиот дел од материјалот на албумот, кој го красат интересни соработки; песната „Пружам руке две“ ја отпеа со Дадо Топиќ, „Sunday vibes“ со Влатко Стефановски, „Life of Jupiter“ со групата „Јупитер“, „Music philosophy“ со Теодоси Спасов, „Зрно наде“ со Сакис Доволис, а интересниот сингл „Балкан фанк“ е создаден во соработка со Џамбо Агушев и Јан Стефановски.

Иван Кукиќ, кој на јавноста ѝ е познат како бас-гитарист во Триото на Влатко Стефановски, пред една година дипломираше музичка продукција и дизајн на звук, а по дипломирањето во Белград се стекна со титулата „Дипломиран уметник на повеќемедиска уметност“.

Кукиќ свири на шест инструменти: гитара, тапани, пијано, контрабас и народни инструменти, компонира, аранжира и пее. Иако е многу млад, овој љубител на музиката често настапува низ регионот, а беше и дел од неколку меѓународни натпревари.