Четвртото издание на Фестивалот на камерна музика „Класика Меѓународен фестивал Струмица“ ќе се одржи од 2 до 10 јуни во Струмица и ќе претстави пет концертни активности.

Мисијата и програмата на фестивалот на прес-конференција во Скопје ги претставија Влатко Митев, претседател на фестивалското здружение во Струмица, проф. м-р Васил Атанасов, селектор на фестивалската програма, како и учесниците во програмата Летка Димовска Полизова и Глигор Гелебешев.

Основната мисија на фестивалот е во културниот живот во Струмица да биде презентирана и програма со камерна музика од областа на класичната уметност. Иако станува збор за млад фестивал кој треба дополнително да расте, во програмата веќе се присутни музичари од регионот, а за првпат годинава фестивалот доби поддршка и од Министерството за култура и туризам. Програмата годинава ќе биде реализирана во пет вечери од 2 до 10 јуни.

Свеченото отворање ќе се одржи на 2 јуни со настап на дуо пијано Катерина Гелебешева Костадиновска и Глигор Гелебешев во фоајето на НУЦК „Антон Панов“ во Струмица. Пијанистот Гелебешев објасни дека на програмата на концертот ќе има три увертири за четирирачно пијано, а во вториот дел ќе бидат изведени шест пиеси со оригинални композиции.

На 5 јуни ќе следува концерт на гудачкиот квартет „Арте“ од Република Бугарија. Квартетот е во состав Десислава Петева (флејта), Демни Гигова (виола), Теодора Атанасова (виолончело) и Петја Баговска (контрабас). На 7 јуни ќе настапи камерното дуо Павлина Сенич – сопран (Чешка) и Крсте Бадаровски – пијано (Македонија, Чешка).

Во црквата „Св. Петнаесет великомаченици“ во Струмица на 8 јуни ќе настапи женскиот хор „Св. Злата Мегленска“ под диригентската палка на Летка Димовска Полизова. Диригентката истакна дека хоровите ретко наоѓаат простор за настап на фестивалите во Македонија и дека фестивалот во Струмица, иако е млад во своето постоење, сепак успеал да одвои место во програмата за хорска музика. На програмата на хорот ќе бидат композиции од меѓународни автори кои создавале православна музика.

Фестивалот ќе заврши со концерт на Квартет саксофони, во состав Горан Кавраков, Никола Темелков, Славица Деспотова и Даме Камчев, кои на 10 јуни ќе настапат во фоајето на НУЦК „Антон Панов“ во Струмица.

Селекторот на фестивалската програма проф. м-р Васил Атанасов истакна дека на фестивалот сакаат да имаат поразновидна музика, а притоа да биде задржан критериумот на изведбата. Целта на фестивалот е да привлече млада и нова публика и на тој начин да се поттикне интересот и љубовта кон камерното музицирање. Затоа во селекцијата на програмата има музика со изразена музичка вредност, а истовремено е допадлива и за публиката.

(Текстот е објавен во „Културен печат“ број 282, во печатеното издание на весникот „Слободен печат“ на 23-25.5.2025)