Најстариот универзитет во земјава, УКИМ, денеска им додели награди за своите најдобри научници по повод Светскиот ден на науката за мир и развој. Дел од наградените научници забележаа дека Македонија е земја со значаен потенцијал, но дека државата недоволно вложува во истражувачките активности и недоволно ги користи резултатите од истражувањата, а тоа е пречка за напредок и развој.

„Науката и технологијата може да го трансформираат општеството, да ги решат предизвиците и со тоа да овозможат подобар живот за секој граѓанин. Затоа е потребно заедничка посветеност од академската заедница, од индустријата и од Владата. Знаеме дека секој денар вложен во истражување има потенцијал за повеќекратен поврат преку враѓање на средства во државниот буџет преку зајакнување и конкурентна економија“, рече универзитетскиот професор Димитар Трајанов од Факултетот за информатички науки и компјутерско инженерство, според „ТВ24“.

Според професорот Владимир Трајковиќ, во време кога не можат да сметаат на многу пари од државата, можеби треба да се поттикнат и наградат научниците кои во својата работа аплицираат и добиваат голем број проекти.

Ректорката на Универзитетот „Св. Кирил и Методиј“, Билјана Ангеловска, ги додели наградите за најдобри научници и уметник на годината во повеќе научно-истражувачки подрачја.

Меѓу наградените професори за најдобар научник се и Александар Стојков, Даниел Галинов, Андреј Николовски, Александар Узунов, додека во категоријата „уметник на годината“, признанието го доби професорката од Драмскиот факултет во Скопје, Зоја Бузалковска.