Филмската продукција „Сестри и брат Митевски“ на 2 април почна со снимање на долгометражниот игран филм „Скејтањето не е за девојчиња“ во режија на Дина Дума.

Проектот е копродукција меѓу Македонија, Белгија, Словенија и Хрватска, од каде доаѓа креативна и техничка екипа. Филмскиот проект е сместен во енергичната ромска заедница во Шуто Оризари.

Филмската приказна следи три генерации жени – додека тие се движат низ судирот меѓу традицијата и предизвиците од модерното време. Низ светогледот на 12-годишната Адела, филмот отвора свет во кој три генерации жени се осмелуваат да ги препишат сопствените судбини и да ги оспорат границите на општеството обликувано од традицијата.

Локациите на снимање се на територијата на Скопје. Главните улоги ги толкуваат натуршчици и актери од ромската популација: Ефќар Абаз, Џефрина Јашари, Симонида Селимовиќ и Ганимед Абдула. Сценариото е на Дина Дума, косценаристи се Лидија Мојсовска и Теона Стругар Митевска, директор на фотографија е Фредерик Ноиром, сценограф е Вук Митевски, костимограф е Матеја Фајт, шминката е на Мојца Горогранц-Петрушевска, кастинг-директор е Киријана А. Николоска. Продуцент на филмот е Лабина Митевска, копродуценти се Себастијан Делој, Данијел Хочевар и Вања Сремац.

Проектот е финансиски поддржан од Агенцијата за филм на Република Северна Македонија, како и од националните и регионални фондови на Белгија, Словенија, Хрватска и од „Еуримаж“.