Во судот во Струга денеска продолжува судскиот процес против тројца обвинети доктори од струшката болница за отстранетите органи (матка, јајник и бубрег) на Јалдз Веапоска. Таа отишла да се породи со царски рез, но излезе од болница без три органи и заврши на скопските клиники во животозагрозувачка состојба.

На барање на адвокатите на обвинетите лекари Мухамед Асани, Блертон Асани и Лилјана Јованоска, судијата Јордан Јованов, на последното рочиште пред два месеци, донесе решение Медицинскиот факултет во Скопје да одговори зошто биле избрани надворешни членови при изработката на супервештачењето. Најверојатно докторите не се задоволни од супервештачењето со оглед на тоа што го спорат составот на лекарите што го извршиле тоа супервештачење – дека дел од нив не биле професори од Медицинскиот факултет.

Адвокатскиот тим на обвинетите лекари гинекологот Мухамед Асани, неговиот син доктор Блертон Асани и доктор Лилјана Јованоска, Игор Петковски смета дека комисијата, која го изработи супервештачењето треба да биде составена од професори на Медицинскиот факултет – Скопје. Во случајот само еден од членовите бил од таа институција, додека останатите двајца, биле професор од Медицинскиот факултет во Штип и докторка која имала своја приватна здравствена ординација.

Оштетената Веапоска повтори дека очекува правда и оти благодарение на супер вештчаењето се надева дека ќе дојде правдата.

Супервештачење беше направено зашто имаше дијаметрална спротивставеност меѓу вештачењето од Судска медицина (што го побара обвинителството) и вештачењето на одбраната (што го изработи професор доктор Драги Дабески). Според судска медицина имало пропусти во текот на целата хоспитализација, а според Дабески лекарите ѝ го спасиле животот на Вепоска.

Судскиот процес со родилката од Дебар Јилдз Веапоска, на која по породувањето со царски рез, во Болницата во Струга и беа отстранети три органи три пати почнуваше од почеток поради менување на судечките судии, а делото застарува во 2026 година.