Коронавирусот влезе во таборот на македонската ракометна репрезентација пред стартот подготовките за квалификациите за ЕП 2022.

Тренерот на репрезентативните голмани, Александар Царчев на социјалните мрежи објави дека е позитивен на коронавирус и дека веќе се наоѓа во самоизолација, дека нема симптоми и се чувствува добро.

„Би сакал да ја информирам јавноста дека ден пред собирот на репрезентацијата сум позитивен на Ковид-19 асимптоматски. И покрај сите протоколи за заштита од оваа пандемија никој не е сигурен и имун на ова зло. Чувајте се сограѓани и со лесно нека е и со помин. Единствено жалам што во моментов не можам да и помогнам на репрезентацијата за претстојните квалификации со Финска и Швајцарија. Се надевам дека нашите голмани ќе бидат на висина на задачата и како и секогаш ќе допринесат за успешен резултат. Спортски поздрав до сите и после 10-дневниот карантин повторно се гледаме на терен“, напиша Царчев на својот Фејсбук профил.

Ова значи дека Никола Марковски, Марко Кизиќ и Мартин Томовски подготовките ќе ги поминат без тренерот Царчев.
Македонија на 4. ноември во Скопје игра против Финска, а четири дена подоцна и гостува на Швајцарија.