Поради изведување на градежни работи на дел од улицата „Лазар Личеноски” во Скопје, утре ќе се воведе привремен сообраќаен режим, информираат од Град Скопје.

Посочуваат дека поради нанесување завршен асфалтен слој на дел од трасата на улица „Лазар Личеновски”, од утре, до завршувањето на градежните работи, целосно за сообраќај ќе биде затворен делот од улицата од раскрсницата со улица „Самоулова” и булеварот „Гоце Делчев” до сервисната улица за влез на паркингот кај СРЦ „Кале”.

– Овие градежни активности се реализираат во рамките на проектот за фазната реконструкција на улицата „Лазар Личеновски”. Со овој проект е предвидена целосна реконструкција на коловозот на потег во вкупна должина од 493 метри, се вели во соопштението на Град Скопје.

Од Град Скопје апелираат до сите учесници во сообраќајот да ја почитуваат поставената сообраќајна сигнализација, да се придржуваат до времениот режим на сообраќај, и ги замолуваат сите учесници во сообраќајот за трпение и разбирање поради можното отежнато одвивање на сообраќајот во овој дел на градот.