Белгискиот селектор Руди Гарсија трпи критики во таа земја по објавувањето на списокот на играчи за дуелот со Македонија в петок и со Велс три дена потоа. Тоа се мечеви од Квалификациите за Мундијалот 2026. За Белгијците овие два меча се круцијални исто како и за Македонија, а Гарсија е критикуван најмногу поради изборот во напаѓачкиот дел.

Ромелу Лукаку подолго време е реконвалесцент и на него не може да се смета, а тоа е голем проблем за Гарсија во нападот. Полемики најмногу предизвика вклучувањето на напаѓачот Миши Бачуаи, иако тој одамна не е стартер во Ајнтрахт Франкфурт и не е во голгетерска форма.

Фудбалската јавност се прашува зошто на списокот на Гарсија наместо Бачуаи, не е Лука Стасен, кој игра во добра напаѓачка форма за Сент Етјен. Го нема ни Ромео Вермант од Клуб Бриж, исто така во добра напаѓачка форма. Новинарот Саша Таволиери е жесток во критиките.

– Изненаден сум што на списокот не гледам играчи кои добро се снаоѓаа во последните недели и кои го заслужија тоа. Бачуаи, од спортска гледна точка, нема смисла да биде во оваа репрезентација; помина долго време откако беше стартер за Ајнтрахт. И сепак, тој е во тимот затоа што нема да прави бранови. Ќе биде бескорисен, но главно нема да крева врева – вели новинарот.

Речиси целата фудбалска јавност во Белгија има забелешки на Гарсија.

– Го нема Вермант? Го нема Стасен? Збунет сум. Ни треба вистински центарфор… Бачуаи, секогаш е во тимот, но никогаш не игра ниедна минута – вели Филип Албер, поранешен фудбалер, а сега коментатор.

Фаворитот број еден во нашата група е поранлив одошто вообичаено, соочен со ваква атмосфера пред мечот со Македонија. Гарсија не смее да дозволи кикс.

Умут Мелер ќе го суди мечот во Гент меѓу Белгија и Македонија