Новогодишните куќички почнаа да се поставуваат на градскиот плоштад, иако градоначалничката Данела Арсовска досега не информира дали со ова започнувааат подготовките за новогодишните празници, дали ќе следува новогодишно украсување во Скопје и дали се планира некаква манифестација која претпразнично би се случувала во градот.

Единствено што може да се види како јавно достапна информација поврзана со предновогодишната атмосфера е тоа дека до 6 декември завршува јавниот повик на Град Скопје за доделување финансиски средства за реализација на настанот „Новогодишен базар“.

Минатата недела Арсовска, во одговор на новинарско прашање изјави дека во тек е постапката и неделава можеби ќе има информации за украсувањето, но помина повеќе од половина седмица, а ништо не се кажува.

Затоа, она што денеска се случува на плоштадот „Македонија“ сепак најавува дека тука нешто ќе се случува во наредниот период. Дрвените куќички пристигнуваат на плоштадот со камиончиња,  присутен е и багер, а со друг камион истовремено се заменуваа светилки на канделабрите. Во сета бркотница со возила на плоштадот, среќа е што подната фонтана цела година и повеќе е заградена со жардиниери и бетонски топки за да се избегне повторно некое возило да пропадне во неа.

Минатата пролет новогодишните куќички на плоштадот го дочекаа расцветувањето на дрвјата,  а градоначалничката тврдеше дека дрвените куќарки не биле новогодишни, туку се користеле за секакви манифестации, веројатно за да го оправда фактот дека останаа на плоштадот „заборавени“ со месеци после Нова година.