Принцот Вилијам: Ќе ја поддржиме секоја одлука на карипските нации
Британскиот принц Вилијам рече дека ги почитува и поддржува сите одлуки донесени од карипските нации, имајќи предвид дека Белизе, Бахамите и Јамајка размислуваат да ги прекинат врските со британската монархија. На крајот од неговата турнеја по Карибите, обележана со протести против наследството на Британската империја, принцот Вилијам, внук на кралицата Елизабета Втора, призна дека односот меѓу трите карипски држави и британската круна се менува.
Препорачано
„Знам дека сите со нетрпение очекувате да прославите 50 години независност следната година, тоа е вашата златна годишнина“, рече принцот во Насау, главниот град на Бахамите, каде што одржа говор. „Со оглед на тоа што Јамајка оваа година слави 60 години независност, а Белизе минатата година прослави 40 години независност, сакам да го кажам ова: гордо ги поддржуваме и почитуваме одлуките што ги носите за вашата иднина. Односите се развиваат. Пријателството трае. “ вели британскиот принц.
Неговиот говор јасно покажува дека кралското семејство има намера да ги поддржи карипските земји доколку одлучат повеќе да не ја признаваат кралицата на чело на нивните држави, како што направи Барбадос во ноември минатата година. Бакингемската палата вели дека таквите одлуки им ги остава на локалното население и на политичарите.
Некои британски медиуми го критикуваа кралското семејство
За 70 години на тронот, што беше причина за турнејата на Карибите на принцот Вилијам и неговата сопруга Кејт, британската кралица беше сведок на прекин на врските меѓу поранешните колонии и Обединетото Кралство.
Но, Елизабета Втора формално остана кралица на 15 други земји, вклучувајќи ги Австралија, Канада и Нов Зеланд. Посетата на член на британското кралско семејство беше придружена со протести поради британското колонијално владеење обележано со трговијата со робови. Затоа демонстрантите бараат репарации од Лондон. Во Кингстон, главниот град на Јамајка, Вилијам изрази „жалење“ за улогата на Британија во трговијата со робови.
Стотици илјади африкански робови беа донесени на Јамајка за време на британското владеење за да работат во нехумани услови на огромни плантажи. Јамајканскиот премиер Ендрју Холнес директно на состанокот во средата му кажа на принцот Вилијам дека неговата земја сака да стане „независна“.
Некои британски медиуми го критикуваа однесувањето на членовите на кралското семејство за време на турнејата, особено затоа што преку жичена ограда се ракуваа со децата во Јамајка.
