Чед Дејбел од Ајдахо е обвинет за убиство на неговата поранешна сопруга Тами Дејбел и двете деца, Џошуа „Џеј Џеј“ Валоу (7) и Тајли Рајан (16). Мајката на децата, Лори Валоу Дејбел, минатата година беше осудена на доживотен затвор за убиствата, пишува Би-Би-Си.

Доколку судот го прогласи Дејбел (55) за виновен, тој се соочува со смртна казна. Тој се изјасни за невин. Обвинителите на почетокот на судењето вчера рекоа дека тој и Валоу верувале дека нејзините деца се зли духови и ги убиле во 2019 година, околу една година откако парот се сретнал на верски настан.

Во обвинението се наведува дека парот имал афера додека Дејбел се уште бил во брак и дека сакале да се „ослободат“ од неговата сопруга. „Тој се погрижи никој, ниту еден закон да не му застане на патот на неговата посакувана судбина. Неговата желба за секс, пари и моќ го навела да ги следи овие амбиции. Сето тоа доведе до смрт на неговата сопруга и двете невини деца”. рече обвинителот Роб Вуд.

По долга потрага, полицијата ги пронашла посмртните останки на децата закопани на имотот на Дејбел во јуни 2020 година. Едното дете било распарчено и изгорено, а другото врзано. Тами Дејбел починала од задушување во октомври 2019 година, 17 дена пред Дејбел да се омажи за Валоу на церемонија на Хаваи.

Адвокатот на Дејбел, Џон Приор, рече дека ДНК на неговиот клиент не е пронајдена на посмртните останки на децата и го обвини за убиствата братот на Валоу, Алекс Кокс, кој починал во 2019 година. Во моментот на неговата смрт, полицијата истражувала инцидент во кој Кокс го убил четвртиот сопруг на неговата сестра, Чарлс Валоу. Адвокатот наведува дека неговата ДНК била пронајдена на парче пластика покрај посмртните останки на децата.

Приор, исто така, тврди дека нема докази кои сугерираат дека Тами Дејбел е убиена и дека тоа било несреќа. Судењето се очекува да трае приближно девет недели.

50-годишната Лори Валоу е осудена на доживотен затвор без можност за условно ослободување поради убиство на двете деца и намера да ја убие поранешната сопруга на нејзиниот сопруг. Обвинителите нагласија дека мајката од Ајдахо станала опседната со апокалипсата и верувањето дека нејзините деца мора да бидат убиени за да одат во рајот, според Скај њуз.

Тие изјавија дека Валоу верувала дека нејзиниот син и ќерка се зомбиња, додека таа била божица испратена да ја започне библиската апокалипса. Таа добила вкупно три доживотни затворски казни, по една за секое од обвиненијата.

Пред изрекувањето на пресудата, таа му се обратила на судот тврдејќи дека нејзиното искуство блиску до смртта и овозможило да комуницира со „светот на духот“. Таа му кажа на судијата дека знае „сигурно“ дека нејзините деца и Тами Дејбел се среќни на рајот. Таа тврди дека разговарала со своите деца по нивната смрт.

„Мајката на судниот ден“: Започнува судењето за мајката која си ги уби децата тврдејќи дека се претвориле во „зомби“