Окружното обвинителство на Лос Анџелес не може да поднесе обвинение против Шон Комбс (54), познат како Диди, за вознемирувачкото видео на кое тој насилно физички ја напаѓа својата поранешна Касандра Вентура (37), позната како Каси.

Канцеларијата на окружниот обвинител Џорџ Гаскон објасни во подолга изјава, објавена на Инстаграм, зошто нивните раце се врзани со статутот на застареност.

„Свесни сме за видео кое кружи на интернет на кое наводно се гледа како Шон Комбс напаѓа млада жена во Лос Анџелес. Сликите ги сметаме за крајно вознемирувачки и тешки за гледање“.

Официјалните лица објаснија дека ако бруталниот напад на Комбс навистина се случил во 2016 година, како што објави „Си-ен-ен“, тие „за жал, не можат да поднесат обвиненија бидејќи однесувањето се случило надвор од временската рамка во која може да се гони кривичното дело напад“.

Во коментарите на објавата, луѓето не се задоволни од одлуката, иако е донесена во согласност со законот и тврдат дека тоа е неправда.

„Затоа луѓето како Диди се извлекуваат со злосторствата и затоа луѓето како него се охрабруваат и се чувствуваат над законот“, гласи еден коментар.

Некои сугерираа дека хотелот каде што се случи ова треба да одговара.

„Хотелот го имаше ова видео и никогаш не го пријави во полиција, ниту повика полиција. Треба да се направат исклучоци од статутот на застареност. Таа, дефинитивно, ја заслужува правдата и осигурувањето на хотелот треба да биде во неволја“.