Пи Диди се соочува со сериозни обвиненија, а сега дојде до пресврт во неговиот случај, кога се дозна дека „Си-ен-ен“ уништил важна снимка, тврдат неговите адвокати, пренесува „Њујорк пост“.

Адвокатите на раперот сега тврдат дека успеале да „потврдат, преку форензичка видео анализа“, дека снимката е „суштински изменета во значителни аспекти“, се вели во писмото поднесено во федералниот суд на Менхетен во четвртокот.

„Си-ен-ен“, наводно, бил единствениот кој ја имал оригиналната снимка на која се гледа како Пи Диди ја тепа пејачката Кеси, неговата тогашна девојка, во ходникот на хотелот во Лос Анџелес во 2016 година, а таа повеќе не постои.

„’Си-ен-ен’ ја купи единствената позната копија од снимката од надзорот на хотелот, ја постави снимката на бесплатен софтвер за уредување, го измени видеото, а потоа ја уништи оригиналната снимка, иако знаеше за федералната истрага и постојано известуваше за тоа“, се вели во нивното соопштение.

Одбраната тврди дека „Си-ен-ен“ ја изменил и уредувал снимката со „прикривање на временскиот печат, а потоа менување на редоследот на видео секвенците. Тие, исто така, ја забрзале снимката за лажно да ги прикажат настаните на снимката како да се случуваат побрзо отколку што всушност се случувале. Како резултат на тоа, видеата на ‘Си-ен-ен’ не ги прикажуваат фер и прецизно настаните што се случиле“.

Хотелот во кој се случи инцидентот во меѓувреме е затворен, а според информациите нема други снимки од инцидентот.