Оркестарот на Филхармонија, на 24 февруари, премиерно ќе го изведе делото „Реквием за мојот пријател“ од познатиот полски композитор Збигњев Прајснер. Диригент на концертот е маестро Емил Табаков (Бугарија), а како солисти ќе настапат Билјана Јосифов – сопран, Катерина Стојановска – сопран, Бојан Булатовиќ (Србија) – контратенор, Ѓорѓи Цуцковски – тенор, Александар Стефаноски (Македонија/Германија) – бас, Золтан Борбељ (Србија) – оргуљи, Каролина Бетер (Германија/Србија) – соло блок флејта и мешаниот хор „Про Арс“.

Станува збор за едно од најубавите дела во историјата на класичната музика, а авторот кој ја создаде музиката за филмовите на генијалниот полски режисер Кшиштоф Кишловски за првпат ќе прозвучи на нашата сцена.

– Делото „Реквием за мојот пријател“, кое е посветено на Кишловски, првично било замислено како концертно дело со поинаква природа, кое требало да се изведува на подиуми во европските метрополи. Всушност, Кишловски и требало да го режира. Но, со неговата прерана смрт во 1996 година, природата на самото дело се менува.

Поделено на два дела, насловени како „Реквием“ и „Живот“, ова е најемотивното дело во опусот на Прајснер. Делото на Прајснер, наедно е и молитва за сите страданија што ни се случуваат, особено во последните две години, но и исказ на длабоко сочувство – посочуваат од Филхармонија.