Битолскиот народен театар на 21 и 22 мај ги отвора вратите за љубителите на театарската уметност со премиерната изведба на најновиот проект наречен „Молитва по Достоевски“, кој е инспириран од делото, животот и филозофијата на двајца великани, писателот Фјодор Михајлович Достоевски и поетот, музичар и кантавтор Владимир Семјонович Висоцки. Испреплетена со музиката на групата „Фолтин“, надополнето со драмската изведба на актерите Огнен Дранговски и Катерина Аневска Дранговска, претставата се обидува да ја обедини и соедини нивната музичка и актерска енергија катализирана од сценографот Валентин Светозарев.

Поставувањето на претставата се поклопува со 200 години од раѓањето на Достоевски, кој бил инспирација за многу генерации актери, писатели и музичари, а негови дела често се поставувани и на сцената на Битолскиот театар. Според директорот на театарот, Иван Јерчиќ, премиерата на претставата е реализирана со сопствени средства и ќе се изведува според сите протоколи и со ограничен број на публика.

(Текстот е објавен во „Културен печат“ број 81, во печатеното издание на „Слободен печат“ на 22-24 мај 2021)