Фудбалските клубови од Премиер лигата ги изгласаа датумите на летниот преоден рок и ќе има два преодни рокови ова лето, а причината е Светското клупско првенство.

Првиот „пазар“ ќе биде отворен помеѓу 1 и 10 јуни и ќе им овозможи на клубовите да се засилат пред почетокот на Светското клупско првенство. Англиски учесници на турнирот кој започнува на 14 јуни се Манчестер сити и Челси.

После тоа, преодниот рок повторно ќе се отвори на 16 јуни и ќе се затвори на 1 септември.

Претходно оваа недела беше објавено дека некои клубови сакаат преодниот рок да се затвори пред почетокот на новата сезона во Премиер лигата, која започнува на 14 август.

Овој предлог се разговараше на состанокот овој четврток, но клубовите се согласија дека Премиер лигата не може сама да ја спроведе оваа промена и за да се прифати предвремено затворање на преодниот рок, треба да се договорат сите лиги од петте најсилни европски лиги. Во спротивно англиските екипи би биле во нерамноправна позиција.