Денеска во просториите на „Europe House“ – Скопје преку панел дискусија беше одбележана годишнината од „Кадифената револуција“. Настанот беше организиран од страна на Чешката амбасада во Скопје и тема на дебатата беше клучната улога на студентите во „Кадифената револуција“ и патот на Чешката Република кон нејзиното членство во Европската унија и НАТО.

На настанот учествуваа амбасадорите на Република Чешка Н.Е Јарослав Лудва и на Република Словачка, Н.Е Хенрих Маркуш, како и неколку професори и новинари.

Се дискутираше и за вклучувањето на младите во борбата за слободата и демократијата, влијанието кое го имаат студентите во креирањето на политиките во една држава како и актуелната положба на студентите во Северна Македонија.

„Важноста на младите во учествувањето во општестевните промени, тие треба да бидат активни, да бидат движечката сила, а тоа беше случајот во 1989 година, кога студентите беа движечката сила на политичките промени“ изјави чешкиот амбасадор Лудва.

Раскажувајќи ги настаните кои ја одбележале „Кадифената револуција“, студентите беа запознаени со историјата на Чехословачка, како и со животот по поделбата во две држави какви што ги знаеме сега.

„Знаеме со кои предизвици се соочувате. На пример, еден од тие предизвици е миграцијата. Немаме директни препораки како да се спративе со овие проблеми, но затоа сакаме да дискутираме на оваа тема. Еден од аспектите на „Кадифената револуција“ всушност е процесот во кој Чехословачка се претвори во две држави, „Кадифената револуција“ имаше улога во ова“ изјави словачкиот амбасадор Маркуш.