Преку кампањата на Министерството за здравство и Светската здравствена организација (СЗО) „Од врата до врата“, вакцинирани се над 1.000 деца. Кампањата имаше за цел да имунизира што е можно повеќе деца кои го пропуштиле терминот за рутинските вакцини.

Од Министерството соопштија дека посетени се вкупно 3.373 семејства, заедници и собиралишта на лица во повеќе од 200 урбани и рурални средини. Медицинските лица одржале едукативни разговори и предавања, а поделени се над 6.000 материјали за рутинска вакцинација против Ковид-19.

Кампањата почна на 24 април 2023 година и се спроведуваше вкупно четири недели, како дел од европската недела на имунизација 2023 година, со финансиска поддршка од ЕУ.

Во теренските посети, како што информира ресорното Министерство, биле вклучени 30 медицински тимови, со цел презентирање на бенефитите од имунизација, како и администрирање вакцини против Ковид-19 и рутинска вакцинација.