Во семејниот дом на актерката Стојна Костовска, традиционално секоја година за време на новогодишните и божиќните празници се готват вкусни јадења и се изготвуваат икебани од вештите раце на нејзиниот сопруг Зооран. Иако полека но сигурно ја гази осмата деценија од животот, Костовска покрај големиот број на обврски, задолжително подготвува празнични јадења, а за баклавата вели дека е нејзиниот посебен специјалитет на трпезата.

За Стојна овие празници минати во кругот на најблиските имаат посебно значење. Иако Нова година одамна не е период кој ѝ предизвикува радост и еуфорија, бидејќи токму на тој ден пред многу години ја загуби својата мајка, претстојниот голем празник, раѓањето на Господ Исус Христос – Божиќ, како и останатите празници во неа будат една посебна благосостојба.

Која е вашата прва асоцијација кога ќе се спомене Нова година и божиќни празници?

– Нова година не ми значи многу, но веднаш ме потсетува дека една година сум повозрасна, но тоа е животот сите се бориме да остариме, тоа е привилегија на човековото битие. Што се однесува до божиќните празници, тие ми се едни од омилените. Вечерта на Бадник се собираме крај огнот и се дружиме со комшиите и нормално консумираме посна храна. Ја кршиме Бадниковата погача со паричка, а тој што ќе ја добие паричката веруваме дека ќе биде среќен. Божиќ е нешто друго, го сакам Божиќ, го сакам Христовото раѓање, затоа чувство ми е посебно. Подготвувам разни џаконии, врв ми е баклавата направена од моите раце. Во мојот дом, мора да има икона, цвеќе, украси, полна торба со овошје (ореви, костени, јаболка, бонбони и др.) Утрото кога децата пеат пред врата со задоволство ги пречекувам и дарувам. Потоа се подготвувам и одам во црквата Св. Петар и Павле во Лисиче. Средби со луѓе, честички по повод Христовото раѓање, а потоа на ред се – печење, сарми, свежи салати, а за зимница да не зборувам, сè подготвено од мои раце. МИР БОЖЈИ, ХРИСТОС СЕ РОДИ.

Која приказна или случка од детството ви буди убави чувства овој период од годината?

– Имав убаво детство. Сè што денес подготвувам јас, тоа го правеше и мојата мајка вредница. Во минатото во Скопје имаше многу снег и при една игра му ја дупнав главата на едно од децата. Тоа беше страшно. Сега сме другари и многу често се сеќаваме на случката.

Кој денес ги исполнува вашите желби, а не е Дедо мраз?

– Немам големи желби. Сакам само да не служи здравјето, мене и моето потесно и пошироко семејство.

Што е она што ви ја одбележа изминатата 2024 година?

– 2024 година беше добра за моето семејство, но ќе бидам среќна ако продолжи …

Која „лекција“ ја научивте?

– Можеби е доцна но сепак научив да не верувам секому, јас сум искрена и дружељубива личност, но сепак бев изневерена.

Што најмногу, а што најмалку ви се допаѓа во Скопје овој период во годината?

– Скопје е мој град и не би можела да живеам на друго место. Кога е загаден воздух знам да речам; Уф што би избегала од градов и би одела на скијање. Скопје го сакам, Скопје е метропола, но сепак јас го сакам „Моето Скопје“.

Кој е вашиот семеен ритуал за време на празниците?

– Мојот дом има друго руво, тука е мојот сопруг Зоран Костовски кој е мајстор за икебани. Кога работи не сака никој да му додева, цар е.

Со кого и каде ќе ги поминете овие празници?

– Домашна атмосфера релаксирачка со семејството, секогаш свечено облечени, да се разликува од останатите денови.

Дали има нешто кои си го ветивте дека никако нема да го повторите во следната година?

– Никому ништо не ветувам, па ни себе, ги оставам работите да течат спонтано. Бегам од токсични луѓе.

Која е вашата порака до читателите оваа година?

– На читателите им посакувам, пред сè, среќа, пари, здравје и редовно да купуваат „Слободен Печат“. Почитувани да го чуваме нашиот град и наша Македонија, ние друг дом немаме. Сакајте ја својата земја, како својата душа. Ве сака, Стојна Костовска.