Пратеникот од ВМРО-ДПМНЕ, Миле Лефков, објави дека денеска во Собранието, со амандман се одобрени два милиони денари (околу 32.000 евра) за изградба на спомен-обележје за загинатите во трагичниот пожар во дискотеката „Пулс“, кој ќе биде подигнат во центарот на Кочани.

– Денес во Собрание, со амандман обезбедени се 2 милиони денари како првични средства за идејно решение и отпочнување на активности за спомен-обележје во чест на младите кои ги загубија животите во трагедијата во дискотеката “Пулс”. Ова барање е координирано со родителите на настраданите и произлегува од нивната и нашата заедничка желба – барем дел од болката да ја преточиме во достоинствено сеќавање, а трагедијата да не се заборави. Ќе биде поставено во централното градско подрачје, и ќе биде тивок сведок на болката, но и силна порака за солидарност, сеќавање и обврска да не дозволиме ваква трагедија никогаш повеќе, напиша Лефков на социјалните мрежи.