Познатиот радио водител Крис Еванс, во неговата емисија на „Вирџин радио“, јавно објави дека лекарите неодамна му пренеле застрашувачки вести. Имено, тој со слушателите ја сподели веста дека лекарите му дијагностицирале рак на кожата, пишува „Гардијан“.

Но, како што објаснува тој, за среќа, ракот бил дијагностициран во исклучително рана фаза и ги уверил слушателите дека сѐ е во ред и дека се надева дека ќе закрепне целосно.

Инаку, Крис пред само четири години изјави дека се плаши од рак на кожата, откако „открил траги“ на телото.

„Треба да разговараме за што точно се работи… Тоа е меланом. Постои онаа фраза „малигнен меланом“, но таа фраза е излишна, затоа што ако е меланом, тогаш е и малиген. За среќа, бидејќи е многу рано откриен, може да се излечи“, објаснил тој.

Инаку, 57-годишниот водител е страствен тркач, но објаснил дека нема да може да ужива во омилената активност месец дена по третманот. Тој дополнително се пошегувал дека до почетокот на лекувањето, односно на 14 септември, планира „само да трча“.

Крис исто така, зборувал дека во 2015 година, се соочил со стравот од заболување од рак на простата.