Расел Симонс, писател и издавач, хип-хоп магнат и ко-основач на „Деф џем рекордс“, е обвинет за повеќекратни сексуални злоставувања.

Една од наводните жртви на Расел Симонс, Дру Диксон, сега презела правни чекори за да докаже дека нејзините обвиненија се основани.

Диксон поднела тужба за клевета против Симонс поради неговите изјави во интервју во 2023 година, во кое тој се обидел да ги дискредитира нејзините тврдења и да ја омаловажи нејзината приказна.

Тој тврдел дека Диксон ги измислила обвиненијата од желба за слава и дека приказните за неговите наводни жртви биле полни со недоследности.

Меѓутоа, новите правни чекори во овој случај доведоа до вмешаност на уште една моќна личност, Опра Винфри.

Славната американски водителка и филантропка, која во 2020 година првично го поддржа документарниот филм за обвинувањата против Симонс под назив „On The Record“, подоцна се повлече од проектот.

Симонс тврдеше дека тоа го направила затоа што открила „недоследности“ во приказните на жените кои го обвинија, како и дека поседува снимки што ги потврдуваат неговите тврдења.

Сега, адвокатите на Диксон издадоа судски повик во кој бараат Опра Винфри да ги предаде сите релевантни документи, снимки и други материјали кои би можеле да ја расветлат вистината. Таа, исто така, доби наредба да присуствува на рочиштето, кое може и да се снима.

Останува нејасно дали Винфри досега одговорила на оваа покана или нејзиниот правен тим се обидел да го оспори барањето.

Нејзината потенцијална вмешаност во овој случај покренува нови прашања – дали нејзиното повлекување од документарецот е резултат на притисок или навистина пронашла докази кои не им оделе во прилог на жртвите? Симонс продолжува да ги негира сите обвинувања, тврдејќи дека неговите односи со жените отсекогаш биле спогодбени.

Диксон, која јавно проговори за своето наводно силување за првпат во 2017 година, тврди дека Симонс ја нападнал во 1995 година во неговиот стан, откако ја намамил под изговор дека сака да ѝ пушти демо лента.

Според нејзините зборови, по нападот, Симонс ја искористил својата моќ за да ја обезбеди нејзината тишина, што подоцна ја принудило да ја напушти „Деф џем рекордс“ и да ја продолжи својата кариера на друго место. Нејзиниот случај е само еден од многуте.

Иако документарниот филм „On The Record“ подоцна беше преземен од Ејџ-би-о откако Винфри го напушти, тој повторно ја покрена дебатата за културата на моќта и тишината во музичката индустрија.

Симонс оттогаш ги напушти Соединетите Држави и се пресели на Бали, каде што не постои спогодба за екстрадиција со Америка. Многумина веруваат дека овој потег е обид да се избегне правдата.

Како што работите продолжуваат да се разоткриваат, се поставува прашањето колку повеќе моќни поединци во индустријата може да се поврзани со овие скандали.