Позната е причината за смртта на Ози Озборн
Посмртницата на Ози Озборн, иконата на хеви-метал музиката, открива дека пејачот починал од срцев удар, а претходно имал и здравствени предизвици како коронарна артериска болест и Паркинсонова болест. Документот е поднесен во матичен регистар во Лондон од страна на неговата ќерка, Ејми Озборн, а како причина за смртта се наведуваат: срцев удар надвор од болница, акутен миокарден инфаркт, коронарна артериска болест и Паркинсон со автономна дисфункција.
Препорачано
Како што објави „Њујорк тајмс“, во посмртницата неговата професија е опишана како: „автор на песни, изведувач и рок легенда“.
Озборн починал на 22 јули во неговиот дом во селото Чалфонт Сент Џајлс, Бакингемшир. На тој ден, воздушна брза помош пристигнала кај неговиот дом, а потоа продолжила кон болницата „Хеарфилд“ во Уксбриџ. Хеликоптерот останал таму околу еден час со вклучени мотори, потврдија податоци од службата за итна помош и компанијата што следи движење на летала.
Семејството на Озборн не ја соопшти причината за смртта во првичната објава, но јавноста одамна беше запознаена со неговата здравствена состојба. Во февруари годинава, пејачот во радио-интервју призна дека веќе не може да оди. Освен Паркинсоновата болест, тој имал и сериозно оштетување на рбетот.
Оваа година фановите стравуваа дека крајот се ближи, особено откако сопругата Шерон најави дека настапот на 5 јули во Бирмингем ќе биде негов последен. Концертот се одржа на стадион недалеку од неговиот роден дом. Таму Озборн одржа два кратки настапа – еден со својата соло програма, друг со легендарниот бенд „Блек Сабат“, кој го основа во 1968 година со тројца пријатели.
Пред публиката која го поздравуваше со овации, Озборн рече: „Шест години сум прикован за постела. Ви благодарам од дното на срцето“.
Како фронтмен на „Блек Сабат“, Ози Озборн се смета за еден од основоположниците на хеви-метал музиката. Музички групи како „Металика“, „Слејер“ и „Антракс“ често го наведуваат како клучно влијание.
Во 2000-тите, тој повторно стана светски познат преку реалното шоу „Семејството Озборн“ на најголемата музичка телевизија Ем-ти-ви, кое траеше од 2002 до 2005 година и на комичен начин го прикажуваше секојдневниот живот на славното семејство.
На 30 јули, илјадници обожаватели се собраа во Бирмингем на погребна поворка, при што ковчегот беше пренесен низ улиците на градот пред да се одржи приватниот погреб.
