Директорот на Центарот за управување со кризи (ЦУК), Мухамед Али, вечерва информира дека над селото Лојане во Општина Липково избувнал пожар на отворено, кој сега е во голем дел локализиран и изгаснат.

Пожарот зафатил борова шума.

-Селото е целосно заштитено, а интензитетот на горењето во појасот на боровата шума значително е намален. Со отворањето на патот за пристап, се овозможи пешадиско дејствување на екипите на ‘Национални шуми’, што значително придонесе кон ограничување на ширењето на огнот- информира Али.

Како што објави тој, при акцијата дејствувал и хеликоптер на Министерството за внатрешни работи (МВР), две екипи на Територијалната противпожарна единица од Куманово, како и екипи на „Национални шуми“. Во гаснењето на пожарот учествувало и локалното население.

-Како директор на Центарот за управување со кризи, лично ги координирав активностите на терен, осигурувајќи соработка меѓу институциите и брза реакција за заштита на животите и имотот на граѓаните. Благодарност до сите учесници за професионалниот ангажман и посветеност – соопшти Али.

Претходно, од ЦУК информираа дека денеска до 18 часот во државата имало вкупно 19 пожари на отворен простор, од кои активни се четири, а изгаснати се 15.