Центарот за управување со кризи (ЦУК) соопшти дека синоќа пожарникарите од Берово со две возила интервенирале на запалена куќа во градот. Во пожарот, едно лице се здобило со изгореници и истото е пренесено во Здравен дом Берово.

ЦУК апелира да се почитуваат препораките на пожарникарите и да не се палат отпадоци на отворено, бидејќи тоа го намалува квалитетот на амбиенталниот воздух.

Истовремено, апелираме за внимателност при прошетките во природа на повисоките места и планините во нашата држава, бидејќи при вакви зимски услови, со снег и мраз, е лизгаво, особено на осоите, се додава во соопштението.

За 24 часа имало вкупно 1 763 повици на единствениот број за итни случаи 112, од коишто „реални“ повици биле 40,22 отсто, а 59,78 проценти биле за други потреби на граѓаните, што не биле итни. Кон полицијата биле упатени 62,59 отсто, кон Итната медицинска помош 32,01 процент, кон пожарникарите 2,52 отсто, а кон АМСМ 0,36 проценти од реалните повици.