Учеството на Израел на Евровизија 2026 би можело да се одлучи во декември во Женева, каде што управното тело на натпреварувањето ќе одлучува за иднината на земјата на евровизиската сцена. Во игра се и драстични опции како повлекување од натпреварувањето или настап под неутрално знаме.

Во екот на растечките контроверзии околу настапот на Израел, на израелските претставници им се испратени неформални предлози кои вклучуваат привремено повлекување од натпреварот или настап под неутрално знаме, дознава Ynet Global.

Според достапните информации, овие предлози не се официјални понуди, туку неофицијални предлози на лица поврзани со организацијата на натпреварувањето. Заговорниците веруваат дека привременото повлекување би можело да го поштеди Израел, како што наведуваат, од „понижувачка дисквалификација“ што би можела да се случи поради зајакнувањето на политичкиот притисок од одредени европски земји. Како алтернативно решение, беше споменат и настап под неутрално знаме, на пример под знамето на израелската јавна радиотелевизија.

Европската радиодифузна унија (ЕБУ) објави дека не предложила никакво решение и дека процесот на консултации со нејзините членови е сè уште во тек. Одлуките, посочуваат тие, нема да бидат донесени пред крајот на тој процес.

Негодување од израелските кругови

Во израелските политички кругови, двата предлози беа пречекани со негодување. Привремената суспензија се смета за преседан што би можел да го отвори патот за трајно исклучување на земјата од натпреварот, додека идејата за настап без националното знаме беше оценета како неприфатлива.

Како дополнителна можност, имаше неофицијален предлог израелската јавна телевизија јавно да се дистанцира од политиката на владата и армијата. Според застапниците на таа идеја, таков гест би можел да влијае на расположението пред гласањето во декември, но извори блиски до телевизијата веруваат дека тоа е малку веројатно да се случи.

Кризата дополнително се засили откако Ирска, Словенија и Холандија објавија дека ќе го бојкотираат натпреварувањето доколку Израел учествува во него. Во Ерусалим постои страв дека овие најави би можеле да предизвикаат верижна реакција и да охрабрат уште повеќе земји да го направат истиот потег.

Израелските власти во моментов се воздржуваат од давање јавни изјави, а надворешниот набљудувач назначен од ЕБУ продолжува со разговорите со претставници на европските земји обидувајќи се да најде решение. Иако ЕБУ не потврди експлицитно дека на декемврискиот состанок ќе се донесе конечна одлука за учеството на Израел, беше потврдено дека дискусијата ќе се однесува на „геополитичката ситуација и учеството на земјите“. Состанокот ќе се одржи во Женева на почетокот на декември.