Повеќејазична табла на Комитетот за национални малцинства во Тирана, го има и македонскиот
Во зградата на Комитетот за национални малцинства во Тирана поставена е повеќејазична табла, вклучително и на македонски јазик.
Препорачано
– Последователен успех, во остварување на легитимните права на македонското национално малцинство во Албанија прокниживме на почетокот на оваа година. Овој пат со поставување на повеќејазична табла на зградата каде што е сместен Комитетот за национални малцинства во Тирана – изјави за МИА, Никола Ѓурѓај претседател на Македонското друштво „Илинден“.
Ѓурај додаде дека по барање на друштвото доставено во јануари 2023 година, до Комитетот, за поставување повеќејазична табла, вклучително и на македонски јазик и неговото кирилско писмо, на кое добиле одговор два месеца подоцна дека истото ќе биде земено предвид.
– Но, помина повеќе од една година, а таблата не беше поставена. Поради тоа на 25 април минатата година испративме реакција до повеќе институции во Република Албанија, меѓу кои и до Народниот правобранител. Народниот правобранител го разгледа барањето, излезе во пресрет и се ангажираше да се постави повеќејазична табла на зградата на Комитетот. Во средината на јуни добивме допис дека ќе биде поставена повеќејазична табла и ете конечно истата е поставена, што е уште една институција со табла на македонски јазик, кое следува по наше барање – посочува тој.
Друштвото изрази голема благодарност до Народниот правобранител и вработените во таа институција, за нивното ангажирање за да се реализира барањето и секако Комитетот за национални малцинства, кој е владин орган, во кој свои претставници имаат деветте малцинства, признати со закон во Албанија.
Претходно по барање на МД „Илинден“ повеќејазични табли, поставија Комесарот за заштита од дискриминација и Народниот правобранител.
