Официјално е потврден датумот на излегување на видеоиграта „Гранд Тефт Ауто VI“ (ГТА 6). „Тејк-Ту“, матичната компанија на „Рокстар гејмс“, на конференција одржана во четврток (7 август) објави дека ГТА 6 ќе биде достапна од 26 мај 2026 година.

На веб-страницата на „Рокстар гејмс“, американскиот производител и издавач на видеоигри, стои порака во која се наведува дека „им е жал што играта ќе излезе подоцна од очекуваното“.

„Интересот и возбудата околу новиот ГТА 6 беа навистина трогателни за целиот наш тим. Ви благодариме за поддршката и трпението додека работиме на финализирањето на играта. Со секоја игра што сме ја објавиле, целта отсекогаш била да ги надминеме вашите очекувања, а ‘Гранд Тефт Ауто VI’ не е исклучок. Се надеваме дека разбирате дека ни е потребно ова дополнително време за да испорачаме ниво на квалитет што го очекувате и заслужувате“, напишаа од компанијата.

Првично, ГТА 6 требаше да излезе во текот на 2025 година. На почетокот од оваа година беше објавен вториот трејлер за играта, заедно со датумот 26 мај 2026, но поради одложувањето на првичниот план, дел од обожавателите беа скептични и мислеа дека и новиот датум може да се помести.

Она што сè уште не е познато е цената на ГТА 6. Со оглед на тоа што „Нинтендо“ ја воведе ерата на игри со цена од 80 долари, се поставува прашањето дали „Тејк-Ту“ ќе го следи тој пример. Со огромниот буџет за развој, компанијата би можела без проблем да постави повисока цена, па дури се шпекулираше и за можноста играта да чини и до 100 долари.

Извршниот директор на „Тејк-Ту“, Штраус Зелник, не откри конкретни информации, но во интервју за „Варајети“ истакна дека целта на компанијата е „да испорача повеќе вредност отколку што наплаќа“.

„Нашата цел отсекогаш била да испорачаме поголема вредност од она што го наплаќаме, па во компанијата отсекогаш имавме варијабилни цени,“ изјави Зелник.

ВИДЕО | Долгоочекувано продолжение: „Рокстар гејмс“ објави трејлер за легендарната видеоигра ГТА 6