Најновото издание на ИК „Славика либрис“ од Скопје е книгата „Русија од страна на кујната“ со поднаслов „Како да се изгради империја со нож, црпалка и виљушка“ од полскиот автор Витолд Шабловски, а во превод на Лидија Танушевска.

Станува збор за книжевна репортажа во која авторот Витолд Шабловски, во потрага по рецептите од руската кујна, ја прикажува руската историја од времето на царското семејство Романови до владеењето на Владимир Путин. Тој ја „лови“ приказната од личните готвачи на царот Николај II, Ленин, Сталин итн., од готвачките во училиштата за време на „гладоморот“ во Украина, од пекарите во опколениот Ленинград, од кримските Татари, подготвувачи на улична храна.

– Од оваа книга ќе дознаете што јадел царот, но и како се снаоѓале за храна изгладнетите војници на Црвената армија; што се јадело во атомската централа „Чернобил“ по хаваријата, но и што јадел Јуриј Гагарин во вселената; како изгледала последната вечера, на која се направил договорот за растурање на Советскиот Сојуз, но и каков готвач бил дедото на претседателот Путин – истакнуваат од „Славика либрис“.

Витолд Шабловски (1980) е полски репортер и сценарист. Неговите книги се објавени на четири континенти. Дипломирал на Катедрата за новинарство и политички науки на Универзитетот во Варшава. Дополнително, студирал политички науки во Истанбул. Лауреат е на повеќе престижни награди. Во моментов, тој е еден од најпреведуваните полски автори.

Неговата збирка репортажи за Турција со наслов „Убиецот од градот на кајсиите“ (2010) се смета за една од најважните книги објавени во САД во 2013 година. Неговата книга „Танцувачките мечки“ американските критичари ја нарекле скапоцен камен, а Шабловски – мајстор за раскажување приказни.

(Текстот е објавен во „Културен печат“ број 257, во печатеното издание на весникот „Слободен печат“ на 23-24.11.2024)