Јапонските научници развија пластика која се разградува во морска вода за неколку часа, потенцијално обезбедувајќи решение за загадувањето на океаните кое сè повеќе го загрозува морскиот живот.

Експертите долго време експериментираат со биоразградлива пластика, но сега научниците од Центарот „РИКЕН“ и Универзитетот во Токио развија нов материјал кој се разградува многу побрзо и не остава траги.

Во лабораторија во градот Ваку во близина на Токио, тимот демонстрираше како парче пластика исчезнало во базен со солена вода откако стоело таму околу еден час.

Учесниците не изнесоа детален план за комерцијализација, но водачот на тимот, Такузо Аида, вели дека истражувањето привлекло значителен интерес, вклучително и од компаниите за пакување.

Научниците ширум светот се тркаат да развијат иновативни решенија за огромниот проблем со загадувањето со пластика, истакнат со кампањи како што е Светскиот ден на животната средина на 5 јуни.

Се очекува загадувањето со пластика да се зголеми тројно до 2040 година, предвидува Програмата на ОН за животна средина, што значи дека дополнителни 23 до 37 милиони метрички тони пластика ќе завршат во светските океани секоја година.

„Децата немаат право да ја изберат планетата на која ќе живеат. Наша должност како научници е да им оставиме најдобра можна средина како наследство“, изјавил Аида.