„Енергична“ супа од тиква според рецептот на Џејми Оливер
Тиква – кралица на есента, идеална за правење разни деликатеси, и слатки и солени, а многу здрави.
Препорачано
Есента е совршено време за подготовка на вкусна супа од тиква. Сега кога дефинитивно е ладно навечер, тоа е совршен изговор да ги откажете вашите планови и да поминете пријатна вечер во затворен простор, јадејќи вкусна храна.
А нема ништо подобро од богата, топла супа.
Топлите есенски вкусови на тиквата и јаболката ја прават оваа супа (потаж) совршена за студените ноќи, а не може да биде полесна за правење.
Состојки:
– 1 кг тиква
– 2 главици кромид
– маслиново масло
– 2 јаболка
– 2 чешниња лук
– 10 грама свежа жалфија
– 200 грама бајат леб
– 50 грама чедар сирење
– 1 коцка зеленчук за супа
– сол и бибер по желба
Подготовка:
Загрејте ја рерната на 200 степени, ако користите вентилатор тогаш на 180 степени.
Излупете ја тиквата, исечете ја на половина и извадете ги семките, па исечете ја на парчиња со средна големина. Исечете го кромидот на коцки.
Сето тоа сипете го во голем плех за печење, намачкајте со две лажици маслиново масло, а потоа печете 30 минути или додека тиквата не омекне.
Во меѓувреме, излупете ги јаболката и извадете ги семките, па исечкајте ги на парчиња, излупете го лукот, но не сечкајте го. Кога ќе истече времето (30 минути), ставете сè во плех со неколку листови жалфија и печете уште 10 минути, пишува британски „Експрес“.
Лебот исечкајте го на коцки и ставете го во плех, а потоа додадете ги преостанатите листови жалфија.
Сето тоа прелијте со лажица маслиново масло и распоредете во еден слој. Одозгора ситно изрендајте 20 грама чедар сирење и печете пет минути или додека не поруменат и не станат крцкави.
Извадете го плехот со тиквата од рерната и ставете сè во голема тава на средно-силен оган. Издробете ја коцката за супа, прелијте со 1 литар зовриена вода и изрендајте го преостанатото чедар сирење.
Оставете да зоврие и варете неколку минути, а потоа тргнете го од оган и мешајте додека не стане мазно.
Зачинете, а потоа сипете во чинии и одозгора ставете ги коцките препечен леб и крцкавата жалфија. По желба додадете неколку капки маслиново масло.
Пријатно!
