Кошаркарите на МЗТ Скопје не успеаја да триумфираат на завршниот турнир во АБА2 лигата кој се играше во СЦ „Јане Сандански“ откако во финалето загуби од Златибор од 73:78 по продолжението од пет минути, но и покрај тоа ќе игра во АБА лигата.

Иако го освои второто место МЗТ Скопје по пауза од четири години повторно ќе биде дел од АБА лигата, додека шампионот Златибор ќе мора да игра дури два бараж двомеча за да обезбеди пласман во најквалитетното регионално кошаркарско натпреварување. Правилата не дозволуваат повеќе од пет екипи од иста земја да играат во АБА лигата и поради тоа прво ќе играат бараж против Сплит, а потоа и со најслаборангираниот српски тим во АБА.

Кошаркарите на МЗТ Скопје очајно го започнаа натпреварот и во втората четвртина имаа негатива од дури 21 поен (19:40) по што остатокот од мечот го поминаа во бркање на предноста на противникот.

„Металците“ успеаја целосно да се вратат во игра во последната четвртина кога во финишот од натпреварот дури и поведе со 70:66, но играчите на Златибор успеаја да се вратат во игра. Последниот напад во регуларниот дел го имаше МЗТ Скопје, но Адем Мекиќ не успеа да погоди по што натреварот замина во продолжение од пет минути.

Во дополнителните пет минути, кошаркарите на Златибор одиграа одлично во одбраната и на „металците“  им дозволија да постигнат само еден поен и на крајот славеа со конечни 73:78.
Војдан Стојановски со 14 поени и 8 скока беше најдобар кај МЗТ Скопје, додека по 12 поени постигнаа Дејвис, Мекиќ и Николов. Кутлешиќ беше најдобар кај Златибор со 33 поени, 10 скока и 4 украдени топки.