Македонската женска тениска репрезентација со 2:1 е поразена од Норвешка во мечот од второто коло од Ц групата на Били Џин Кинг купот што се игра во Ларнака, Кипар.

Во првиот сингл меч Улрике Еикери ја совлада Магдалена Стоилковска со 2:0 во сетови 6:3, 6:2 за водство на Норвежанките, па за израмнување се погрижи Лина Ѓорческа откако го доби мечот со Малене Хелго со убедливи 6:0 и 6:2.

Победникот во овој меч се решаваше во играта во двојки. Македонскиот дубл добро го почна мечот и имаше водство од 4:1 во гемови, но потоа ривалките направија серија од пет гема и го добија првиот сет 6:4 во гемови што значеше водство од 1:0 во сетови.

Ѓорческа и Стоилковска се вратија во мечот и израмнија на 1:1 во сетови откако вториот сет го добија на убедлив начин со 6:1 во гемови.

Во решавачкиот сет на поени Еикери и Хелго од Норвешка поведоа со 4:1 на поени и предноста ја одржуваа искористувајќи ја втората меч топка и решавачкиот сет го добија со 10:5 на поени.

В среда во мечот од третото коло Македонија ќе игра против Косово.