Поранешниот директор на Зоолошката градина Ѓорѓи Галетановски конкурирал за директор на оваа институција на огласот на Град Скопје. Причината поради која се пријавил е тоа што смета дека Зоолошката е во многу полоша состојба од времето кога тој ја раководеше.

– Се одважив и поднесувам документи во името на многу засегнати граѓани на Скопје и Македонија кои ми пишаа деновиве, но најмногу поради животните и моите колеги кои заслужуваат мир, благосостојба и услови достојни за нив. Барам од градоначалничката Данела Арсовска и Советот на Град Скопје мандат од една година во кој тврдам и ветувам дека со моите колеги и многу општествено одговорни компании и јавни личности од државава ќе ги подобрам условите и ќе ја вратам нивната и гордоста на ЗОО Скопје –  вели Галетановски.

Во неговата кратка програма за директор на Зоолошката градина во Скопје тој става фокус на враќање во Европската асоцијација на зоолошки и аквариуми (EAZA), со неколку клучни точки меѓу кои дијагностика на моменталната состојба, анализа на инфраструктурата во Зоолошката, проценка на квалитетот на објектите, безбедноста и удобноста на животните.

Исто така, тој во програмата предвидува испитување на тековната состојба на здравјето, благосостојбата и условите за чување на животните и вклучување на ветеринарни стручњаци за проценка. Во програмата наведува анализа на компетенциите на вработените, примена на најновите стандарди за хуман и одржлив живот на животните, програми за подобрување на животната средина на животните, обезбедување на соодветна исхрана, медицинска грижа и социјална интеракција, постојано едуцирање и тренинг на персоналот според меѓународните стандарди за грижа и управување со животни.

Програмата содржи и други компоненти како енергетска ефикасност, образовни програми за посетителите за подигнување на свеста за заштита на животната средина и зачувување на дивиот свет, подобрување на соработката со другите Зоолошки градини во Европа и светот итн.