Поранешниот кинески министер за земјоделство и рурални работи, Танг Ренџијан, доби условна смртна казна за примање мито, според првостепената пресуда на суд во покраината Џилин, објави новинската агенција Синхуа, пренесе Ројтерс.

Преодниот народен суд во Чангчун ја суспендираше неговата смртна казна за две години, наведувајќи дека поранешниот министер ги признал своите злосторства.

Агенцијата известува дека Танг примил мито, вклучувајќи готовина и имот во вредност од повеќе од 32,1 милиони евра, на различни позиции што ги извршувал од 2007 до 2024 година.

Кинеската комунистичка партија го исклучи Танг од своето членство во ноември 2024 година, шест месеци откако тој беше испитан од антикорупциска агенција и отстранет од функцијата.

Истрагата против Танг беше брзо спроведена, а следеше по слични истраги против министерот за одбрана Ли Шангфу и неговиот претходник Веи Фенгхе.

Танг беше гувернер на западната покраина Гансу од 2017 до 2020 година, пред да биде назначен за министер за земјоделство и рурални работи, според официјалната биографија.

Тој беше осуден на смрт за кривично дело примање мито, суспендиран на две години, лишен од политички права доживотно, а целиот негов личен имот беше конфискуван.