Поранешниот генерал на НАТО Ханс-Лотар Домрозе верува дека Русија и Украина ќе се согласат на прекин на огнот и ќе започнат преговори за завршување на војната во одреден момент во 2023 година, кога „двете страни ќе сфатат дека не се мрднуваат од ќор-сокак“.

Домрозе, германски воен офицер кој до 2016 година ја предводеше една од највисоките команди на НАТО, додаде дека преговорите може да траат долго по првичниот прекин на огнот. Крајот на војната засега е многу неизвесен бидејќи ниту една страна не се согласува околу условите за постигнување мировен договор.

„Очекувам примирје на почетокот на летото, кога двете страни ќе кажат: „Сега веќе нема смисла“. Прекинот на огнот ќе дојде во 2023 година“, изјави Домрозе во интервју за порталот „Украинска правда“. Меѓутоа, таквото примирје само ќе ја запре воената акција.

„Примирјето значи дека ќе престанеме да пукаме. Преговорите веројатно ќе траат долго. Ви треба посредник“, рече тој. „Можеби тоа ќе бидат генералниот секретар на ОН Гутереш, турскиот претседател Ердоган или индискиот премиер Моди, иако навистина никој не е во игра“.

Тој исто така изјави дека преговорите за завршување на војната би можеле да бидат тешки бидејќи и Путин и украинскиот претседател Володимир Зеленски поставиле барања со кои другата страна не се согласува.

Прекинот на огнот е можен доколку Зеленски се согласи на „преоден период“ за реинтеграција на окупираните територии како што е Крим, рече Домрозе.

По 10 месеци борби и големи загуби на двете страни, напорите за почеток на преговори се заглавени. Украина постигна значителен воен напредок во последните месеци, враќајќи ја претходно окупираната територија. Но, Русија не покажува знаци на повлекување, а Путин, наводно, размислува да започне нова офанзива на почетокот на оваа година.

Минатата недела рускиот министер за надворешни работи Сергеј Лавров наведе три услови за мир кои Кремљ нема да ги прифати, велејќи дека е „очигледно дека Киев не е подготвен за дијалог“.

Тој рече дека Русија нема да се согласи на отстранување на нејзините војници од Доњецк, Крим и Запорожје и Херсон, кои беа анектирани во септември. Русија, исто така, не би се согласила да плати репарации или „да се предаде на меѓународните судови и слично“.