Една од најомилените претстави на македонската публика, операта „Травијата“ од Џузепе Верди, на 31 октомври, од 20 часот, ќе биде изведена на сцената на Националната опера и балет.

Диригент е Бисера Чадловска, режијата е на реномираната германска режисерка Верена Штојбер, која креира моќна продукција чии главни атрибути се смелото сценско дејствие и визуелниот квалитет. Сценограф и костимограф на поставката е Софија Шнајдер (Германија), а кореограф е Саша Евтимова.

Во улогата на Виолета Валери ќе настапи Наде Талевска, во улогата на Алфред Жермон настапува Благој Нацоски, во улогата на Жорж Жермон, Марјан Јованоски, а во останатите улоги настапуваат: Марика Поповиќ, Александра Лазарoвска Василевски, Васко Здравков, Драган Ампов, Дејан Стоев, Борко Биџовски, Игор Гиновски, Тихомир Јакимовски, оркестарот, хорот и балетскиот ансамбл на Националната опера и балет.

– Еден од темелите на светскиот оперски репертоар, партитурата на „Травијата“ изобилува со фантастични музички сегменти што уживаат огромна популарност на оперските и концертни подиуми ширум светот. Токму генијалната музика, но и комплексното „безвременско“ либрето напишано според романот „Дамата со камелии“ и живописните ликови кои зборуваат за универзалноста на човековата природа ја сместуваат „Травијата“ меѓу најпопуларните и истовремено најинтимни оперски ремек-дела на Џузепе Верди – известија од Националната опера и балет.