Полскиот премиер Доналд Туск остро ги критикуваше американските републиканци за блокирањето на законот со кој ќе и се даде помош на Украина во износ од 60 милијарди долари, пишува Гардијан.

Ова го изјави во својата објава на социјалните мрежи утринава.

„Почитувани републикански американски сенатори. Роналд Реган, кој ни помогна на милиони од нас да ја вратиме нашата слобода и независност, мора да се преврти денес во својот гроб. Срам да ви е“, објави Туск.

Dear Republican Senators of America. Ronald Reagan, who helped millions of us to win back our freedom and independence, must be turning in his grave today. Shame on you.

— Donald Tusk (@donaldtusk) February 8, 2024

Неочекувано силните критики на централнодесничарскиот премиер доаѓаат откако американскиот Сенат го блокираше двопартиското законодавство за мерките на границата меѓу САД и Мексико и 118 милијарди долари помош за Украина. Законот ќе му обезбеди на Киев воена помош од 60 милијарди долари.

Туск е еден од ветераните на европската политика, откако беше премиер на Полска од 2007 до 2014 година, претседател на Европскиот совет од 2014 до 2019 година и претседател на Европската народна партија од 2019 до 2022 година, пред да се врати на премиерската функција на крајот на минатата година.