Израелските власти не ги коментираа масовните напади со активирање бомби во минирани уреди за комуникација во Либан, ниту се очекува дека кога било ќе негираат или ќе ги потврдат каква било врска со масакрот, во кој загинаа најмалку 25 луѓе, а повеќе од 3.000 беа ранети.

Акцијата била насочена кон членовите на проиранската група Хезболах, но биле убиени и осакатени луѓе што случајно биле во допир или близу до координирано активираните бомби. Меѓу жртвите има и деца.

Либанските власти, Хезболах и Иран одговорноста ја префрлаат врз Израел, но речиси цела недела не можат да утврдат ни во кој погон биле произведени петте илјади пејџери и стотиците уреди за радиокомуникација, ни кој и кога поставил по неколку грама боев експлозив и електронски иницијатор во нив, ни како им ги доставил на членовите на Хезболах. Познато е само дека уредите не биле произведени во погоните на фирмите чие лого го носеле и дека и двете пратки биле доставени до Либан во сличен период пред пет месеци.

Одбранбени експерти, пак, се чудат на дрскоста на спроведување таква операција и на неверојатно високиот степен на тајност во сите нејзини етапи – од планирањето, преку изработката и доставувањето, па сѐ до координираното активирање со алфанумеричка порака.

Сите уреди функционирале нормално со месеци, пред да бидат активирани бомбите во нив.

Израелските агенти и командоси, од друга страна, повеќе од половина век спроведуваат неверојатно дрски акции и молчат за одговорноста.

Софистицираните атентати врз непријателски герилски лидери и терористи почнале уште во 1973 година, кога израелски командоси успеале да лоцираат низа лидери на Палестинската ослободителна организација во Бејрут, среде Либан, и да ги застрелаат на спиење во нивните станови. Акцијата, како одмазда за масакрот на 11 израелски спортисти на Олимписките игри во Минхен во 1972 година, ја водел Ехуд Барак, кој подоцна стана командант на армијата и премиер.

Во 1996 година во Газа бил убиен Јахја Ајаш, познат и како Инженерот, поради мајсторството во изработката бомби за терористи на Хамас. Инженерот бил разнесен кога се јавил на телефон, во кој била поставена бомба.

Веќе во следната година двајца агенти на Мосад се пробиле до засолништето на тогашниот лидер на Хамас, Халед Машал, и се обиделе да го отрујат поставувајќи специјален уред близу неговото уво. Тие, сепак, биле фатени, а Израел итно испратил противотров за да бидат вратени атентаторите неповредени.

Во 2002 година, вториот по ранг командант во Хамас, Салах Пехадех, бил убиен, кога врз зградата во која бил лоциран во Газа била фрлена бомба со 1 тон експлозив.

Во 2010 година во хотел во Дубаи бил убиен Махмуд ал Мабхух, своевремено главниот оперативец на Хамас. Снимки од камерите потврдиле дека нападот го извршиле 26 атентатори преправени како туристи. Мосад упорно негира дека туристите биле израелски агенти.

За неверојатно дрзок важи атентатот врз главниот ирански нуклеарен научник, Мохсен Фахризадех, во 2020 година среде Иран. Колоната во која била и автомобилот на Фахризадех била запрена со рафален оган од моќен митралез, поставен на џип. Научникот бил изрешетан, а во џипот немало митралезец – оружјето било активирано и насочувано од далечина, токму кога се приближил конвојот.

Откако почна војната во Газа, на израелските служби им се припишани низа атентати врз милитантни лидери што често пати тајно менуваат локации заради лична безбедност. Лани во декември со проектил од дрон во Дамаск бил убиен Сејед Рази Мусави, долгогодишен советник на иранската Револуционерна гарда. Во јануари, исто така од дрон, во Бејрут бил ликвидиран Салех Арури, висок командант на Хамас. Во Април двајца ирански генерали беа убиени од проектил што удрил во Конзулатот на Иран во Сирија. Иран за овој напад му се одмазди на Израел со канонада од 300 беспилотни летала и проектили, но повеќето беа соборени.

Во јули Израел со жестоко бомбардирање го уби воениот командант Мохамед Деиф. При нападот со тешки бомби загинаа и најмалку 90 луѓе, вклучувајќи и деца. Само неколку дена подоцна во Бејрут со проектил беше убиен Фуад Шукур, главниот командант на Хезболах, а час подоцна во Техеран е извршен еден од најдрските напади врз израелски непријатели воопшто. Со проектил беше убиен Исмаил Ханије, врховниот лидер на Хамас, додека беше во официјална посета на Иран. Техеран најави дека жестоко ќе се одмазди поради убиството на високиот гостин, но Израел сѐ уште ја чека одмаздата.