Повеќе од половина од светската популација ќе биде со прекумерна тежина до 2035 година доколку не се преземат никакви мерки, предупредува Светската федерација за борба против дебелината, пишува „Би-би-си“.

Според извештајот, дури четири милијарди луѓе ќе бидат погодени од оваа здравствена состојба, а стапките најмногу ќе растат кај децата и тинејџерите. Се очекува стапката на дебелина кај нив да биде двојно поголема отколку во 2020 година.

Најголемиот пораст ќе се забележи во земјите со ниски или просечни примања во Африка и Азија.

Во студијата е наведено дека прекумерната тежина ќе го чини светот повеќе од 4 трилиони долари годишно до 2035 година.

Претседателот на Светската федерација за борба против дебелината, проф. Луис Баур ги опиша наодите од извештајот како јасно предупредување. Тој смета дека овој тренд е особено загрижувачки, додавајќи дека властите ширум светот мораат да направат сè за да ја избегнат оваа ситуација.

Причините за растот на тежината кај луѓето се трендови во исхрана со повеќе високо-обработена храна, високо ниво на седентарно однесување, односно поминување време во седечка положба, послаби политики за контрола на снабдувањето со храна и не доволно добри здравствени услуги да помогнат во регулирањето на телесната тежина и здравствената едукација.

Наодите проценуваат дека зголемената тежина во светот ќе има значајно влијание на светската економија, односно 3 отсто од глобалниот бруто домашен производ.

Во извештајот се додава и дека сознанието за економските влијанија што може да ги предизвика дебелеењето кај луѓето не се никако вина на луѓето со прекумерна телесна тежина.