Фестивалот на критичка култура „Крик“ на 2 јуни, во 20 часот, во КСП „Центар-Јадро“ во Скопје организира концерт и промоција на книгата „Изработување мноштво“ на Гералд Рауниг.

Врз основа на седумнаесет концептуални иновации од неговата нова книга, Гералд Рауниг повторно го реформулира прашањето на револуционерното мноштво преку песна/музика и текст: од „ветровито сродство“ до „трансверзален интелект“, од „дисемблажа“ до „технекологии“, од „минорна мажественост“ до „кондивидуална револуција“.

Испреплетувајќи го поетското и музичкото со теориското згустување на современата филозофија, оваа серија перформанси експериментира со формат меѓу предавање и концерт, при што филозофот настапува како пејач и свири на електрично пијано.

За време на настанот, гостите ќе можат да ја набават и книгата „Изработување мноштво“ од Гералд Рауниг, преведена на македонски јазик од Жарко Трајановски.

„Изработување мноштво“ е поетско-филозофски манифест низ кој развива концепт за материјалистичката филозофија на мноштвото. Преку седумнаесет концептуални иновации – како што се „ветровито сродство“, „трансверзален интелект“, „дисемблажа“, „технекологии“, „минорно машко“ и „кондивидуална револуција“ – Рауниг повторно ја отвора прашалната форма за револуционерното моштво.

Тој тврди дека концептуалните и политичките експерименти со мноштвото околу и по 1968 година не отишле доволно далеку. Денес, анти-идентитетските, квир и мултитудинарни позиции не само што треба да се бранат, туку и радикално да се развиваат, надминувајќи ги досегашните пристапи и историски искуства. Книгата ги повикува читателите да размислуваат, читаат, пишуваат – и, вистински, да создаваат мноштва.

Гералд Рауниг е филозоф и теоретичар на уметноста. Работи во Европскиот институт за прогресивни културни политики (EIPCP – European Institute for Progressive Cultural Policies/) како еден од уредниците на мултилингвалната издавачка платформа и како професор по филозофија на „Zürcher Hochschule der Künste“.

Неговите книги се преведени на англиски, српски, шпански, словенечки, руски, италијански, холандски, турски, а сега, во издание на „Контрапункт“, во едицијата „Пунктум“, која е дел од платформата „Крик“ – фестивал за критичка култура, и на македонски јазик.

Последните години значаен дел од времето Рауниг работи и живее во Малага, Андалузија, каде што ги истражува и работи со автономните колективи и алтернативните форми на самоорганизација.

Фестивалот за критичка култура „Крик“ е финансиски поддржан од програмата „Култура и креативност за Западен Балкан“, Гете-институтот, Министерството за култура на Република Северна Македонија и програмата „Креативна Европа“ на Европската комисија, финансирана од Европската унија.

„Култура и креативност за Западен Балкан“ (CC4WBs) е проект финансиран од Европската унија со цел поттикнување на дијалог на Западен Балкан преку зајакнување на културниот и креативниот сектор за зголемен социо-економски ефект.