Македонската поетеса Наташа Сарџоска гостуваше на 51-то издание на поетскиот фестивал во Салихли, во Турција, каде настапи заедно со поети од Турција, Грција и Франција.

Таа со своите поетски дела на македонски јазик се претстави во Театарот и културен центар во Салихли пред бројна публика. Неколку нејзини песни преведени на турски јазик беа објавени во фестивалското издание во кое беа застапени сите поканети поети. Фестивалот се одржува под покровителство на Општината Салихли заедно со два други фестивала во Маниса и Измир.

Во текот на мај, освен ова поетско патување, Сарџоска на 14 мај ќе се претстави и во Културно-информативниот центар на Република Северна Македонија во Тирана со своја литературна вечер.