Основно училиште „Гоце Делчев“ во Долно Лисиче за десетина месеци ќе добие спортска сала на површина од 650 метри квадратни. Изградбата започна денеска, со поставување камен темелник на објектот во кој ќе се инвестираат околу 32 милиони денари, средства обезбедени од Министерството за образование и наука.

Според градоначалникот на Општина Аеродром, Дејан Митески,станува збор за капитален и многу значаен проект не само за Долно Лисиче, туку и за Аеродром, затоа што учениците, наместо како досега во училници или на отворено, конечно ќе можат да имаат часови по физичко и здравствено образование во соодветни и современи услови.

Во ова подрачно училиште учат над 200 ученици кои за неколку месеци ќе добијат сала изградена според сите современи стандарди. Салата, освен за одржување на редовната настава по физичко во рамките на училиштето, како што информираат од Аеродром, ќе претставува и место каде што жителите на Долно Лисиче ќе можат да тренираат и да се запознаат со различни спортови за што досега одеа во други населби.