Дијамант од 7,5 карати проценет на 20.000 долари е највредниот подарок што го добиле американскиот претседател во заминување Џо Бајден и првата дама Џил.

Скапоцениот камен на првата дама на САД ѝ го подарил индискиот премиер Нарендра Моди во 2023 година, но таа добила и брош, проценет на 14.063 долари, од украинскиот амбасадор, како и комплет од алка, брош и фотоалбум, вредни 4.510 долари, од претседателот и првата дама на Египет.

Претседателот Џо Бајден добивал поскромни подароци. Највредниот е комеморативен фотоалбум, проценет на 7.100 долари, од јужнокорејскиот претседател Јун Сук Јеол, кој неодамна беше отповикан, потоа статуетка на воин (3.495 долари) од монголскиот премиер, сребрен сад (3.300 долари) од султанот од Брунеи и сребрен послужавник (3.160 долари) од израелскиот претседател, а од украинскиот колега Володимир Зеленски на подарок добил колаж проценет на 2.400 долари.

Федералниот закон во САД ги обврзува сите функционери да ги декларираат подароците вредни над 480 долари што ги добиле од колеги од странство. Функционерите може да ги задржат поскромните подароци, а поскапите вообичаено, но не и секогаш, се доставуваат до Националниот архив или се изложуваат. Лицата што ги примиле подароците имаат можност и да ги откупат според пазарната вредност, но тоа ретко се случува.

Дијамантот од 7,5 карати ќе остане во Источното крило на Белата куќа, а другите вредни подароци Џо и Џил Бајден веќе ги доставиле до архивот.

Скапоцени подароци, главно часовници и накит добиле и многумина функционери од Централната разузнавачка агенција, но тие по правило се уништуваат. Вкупната вредност на уништените подароци што ги добиле офицери од ЦИА лани надминала 132.000 долари. Астрографот (телескоп со астролошка камера) вреден 18.000 долари што директорот Вилијам Барнс го добил на подарок од анонимен странски извор, е префрлен во Администрацијата за општи служби. Уништен е, сепак, часовникот „омега“ вреден 11.000 долари што му бил подарен на шефот на ЦИА.