Италијанската финансиска полиција изврши претрес во просториите на Рома, Лацио и Салернитана, како дел од истрагата за сомневања за нереално високи суми на трансфери на играчи.

Истрагата против Рома се осврнува на трансфери меѓу 2017 и 2021 година, додека истрагата за Лацио и Салернитана се однесува на продажбата на играчи меѓу овие два клуба, кои до неодамна му припаѓаа на истиот сопственик, Клаудио Лотито.

Салернитана го смени сопственикот минатата сезона, бидејќи прописите во Серија А не дозволуваат едно лице да контролира два тима.

Прелиминарната истрага за Лацио и неговиот прв човек Лотито се заснова на сомнежи за издавање „фактури за непостоечки трансакции“, пренесуваат италијанските медиуми.

Поради трансферите на играчи и вештачки претставените капитални добивки фудбалскиот клуб Јувентус беше казнет со одземање на 15 бодови и моментално е во тек судската постапка. Следното рочиште е закажано за 10 мај.