Летните олимписки игри во Париз, 33-ти по ред, ќе бидат свечено отворени денеска од 19.30 часот со спектакуларна церемонија со карневал на чамци на Сена.

За прв пат во историјата свеченото отворање ќе се одржи на отворено, со рекорден број од 45.000 полицајци кои ќе се грижат за безбедноста на учесниците.

Париз е домаќин по трет пат во историјата, по 1900 и 1924 година и му се придружува на Лондон, кој ги организираше Игрите во 1908, 1948 и 2012 година. Организацијата на Игрите ќе чини околу девет милијарди евра.

На Игрите учествуваат 10.714 спортисти, во 32 спортови, од 206 земји и територии, плус група спортисти кои ќе се натпреваруваат под знамето на Меѓународниот олимписки комитет, како и тимот за бегалци. Поради војната во Украина, Русија и Белорусија не учествуваат.

Исклучително високи мерки за безбедност на отворањето на ОИ во Париз

Комплетната македонска делегација ја сочинуваат Дарио Ивановски (атлетика), Владимир Егоров (Борење/ до 57 кг, слободен стил), Никола Ѓуретановиќ (пливање/ 400 метри слободно), Анастасија Мојсовска (стрелаштво/10 метри воздушна пушка), Еди Шерифовски (џудо) и Мила Рељиќ (таеквондо).
Покрај спортистите, Македонија на ЛОИ ќе ја претставуваат и судиите Ѓорѓи Начевски и Славе Николов (ракомет), Иван Михајловски (триатлон) и Анета Павловска (тенис). Знаменосци на свеченото отворање ќе бидат Дарио Ивановски и Мила Рељиќ.

Најбројна е експедицијата на САД со 592 спортисти, а потоа следуваат домаќинот Франција со 573, Австралија со 460, Германија со 428, Јапонија со 403, Кина со 388, Шпанија со 383, Италија со 371, Велика Британија со 327… Единствениот спорт што „дебитира“ е брејкденсот. Натпреварите траат до 11 август, а свеченото затворање ќе се одржи на стадионот „Франс“ во Сен Дени, предградие на Париз.