Почнува 77. Меѓународен филмски фестивал во Кан: За Златната палма се натпреваруваат 22 филмови
На 14 мај започнува 77. Меѓународен филмски фестивал во Кан, којшто ќе го одбележи враќањето на ѕвезди како Мерил Стрип, Френсис Форд Копола и Катрин Денев, а за главната награда – „Златна палма“ ќе се натпреваруваат 22 филмски остварувања.
Препорачано
Фестивалот ќе трае до 25 мај. Во трката, меѓу другото, е и филмот „Мегалополис“ на Френсис Форд Копола, со којшто познатиот режисер се враќа во Кан дури 45 години по освоената Златна палма за култниот антивоен филм „Апокалипса сега“.
На списокот се најде и филм на режисерот Жак Одијар, добитник на Златната палма од 2015 година. Тој годинава ќе се натпреварува со „Емилија Перез“ – жанровски определен како криминалистички мјузикл, со Селена Гомез во главната улога.
Во конкуренција за престижната филмска награда е и филмот на прогонетиот руски режисер Кирил Серебреников – „Лимонов“, како и „Видови на добрина“ на Јоргос Лантимос.
Режисерот Кристоф Оноре ќе се натпреварува со филмот „Марчело мио“ – посветен на Марчело Мастројани, кој почина во 1996 година, а годинава се одбележува 100-годишнината од неговото раѓање. За него ќе зборуваат Катрин Денев и ќерка му Кјара Мастројани.
Мерил Стрип (74) ќе добие почесна Златна палма на свеченото отворање на фестивалот. Оваа година и креаторот на брендот „Војна на ѕвездите“, Џорџ Лукас ќе биде почестен со Златна палма, како и легендарниот јапонски анимациски колектив „Студио Гибли“, на јапонскиот режисер на анимирани филмови – Хајао Мијазаки. За првпат оваа награда ќе биде доделена на група, а не на поединец.
Претседател на жирито годинава е Грета Гервиг, американската независна режисерка чијшто филм „Барби“ заработи повеќе од една милијарда долари.
Минатогодишниот победник беше „Анатомија на падот“ на француската режисерка Жастин Трие, којшто потоа доби и Оскар за најдобро сценарио од Американската академија за филмски уметности и науки.
Престижната награда Златна палма, вообичаено вредна околу 20.000 евра, се чува во добро обезбеден сеф на непознато место – до нејзиното предавање. Жирито во најголема тајност одлучува за победникот. Покрај Златната палма, од 2000 година се доделува и Мини-палма, макета на Златната палма – за најдобра глумица и глумец.
Кански филмски фестивал: Мерил Стрип е годинашна добитничка на почесната Златна палма
