Денеска во Скопје почнува вакцинацијата против грип. Министерството за здравство годинава обезбеди 10 илјади дози вакцини повеќе отколку лани, така што вкупниот број на обезбедени дози е 70 илјади. Половината од тие дози веќе се „резервирани“ односно за нив веќе се пријавиле граѓани кои се дел од ризичните групи и сакаат да ги примат. Бесплатната вакцина против грип им следува на неколку категории граѓани кои се пријавија на апликациите обезбедени од Министерството. Станува збор за хронично болни, бремени жени, лица повозрасни од 65 години, здравствени работници, деца на возраст од 6 месеци до 5 години и лица во установи за социјална заштита.

Дел од граѓаните веќе добиваат смс пораки со потврда дека нивната апликација за бесплатна вакцина против грип е примена и се насочуваат на вакциналните пунктови во точно одреден термин.

Вакцинацијата ќе се спроведува на 36 локации низ целата земја.  До сега 33 илјади граѓани се пријавиле преку интернет-страницата вакцинација.мк. Од Комисијата за заразни болести, потсетуваат дека вакцинацијата е најдобар начин за заштита од тешки форми на грип.

Во Скопје, вакцинацијата ќе се одвива во Центарот за јавно здравје и неколку поликлиники.

Во центрите за јавно здравје во Скопје, вакцина против грип е достапна и за оние граѓани кои не се дело д ризичните категории, но тие мора да ја платат односно да добијат т.н. „комерцијална вакцина“.

Набавените вакцини се најнови и висококвалитетни и заштитуваат од четири видови инфлуенца.

Вакцината е според препораките на Светската здравствена организација и на Европската Медицинска Агенција (ЕМА). Четиривалентната вакцина е од производство на „Инфлувак Тетра Абот Биолоџикалс Б.В. Холандија“. Од ист производител се и комерцијалните вакцини.