Црна серија трагедии ја потресе португалската спортска јавност. По смртта на Диого Жота и неговиот брат во сообраќајна несреќа, како и трагичната загуба на голманот Џеферсон Мерли, денеска Португалија остана без уште едно големо спортско име.

На 53-годишна возраст, почина Жорге Коста, поранешен капитен и спортски директор на Порто, и поранешен репрезентативец на Португалија. Несреќата се случила попладнево, во тренинг-центарот на Порто, каде Коста доживеал срцев удар пред очите на соработниците. Иако веднаш била повикана брза помош и бил префрлен во болница, докторите не успеале да му го спасат животот.

Коста и претходно, во 2022 година, имал срцеви проблеми, при што му беа вградени стентови, но се веруваше дека состојбата му е под контрола.

Како фудбалер, Коста беше симбол на цврстина и верност. Поголемиот дел од кариерата ја мина во Порто, каде освои осум титули во домашниот шампионат и пет Купа на Португалија. Круна на кариерата му беа европските трофеи, Купот на УЕФА и Лигата на шампионите во 2004 година, под водство на Жозе Мурињо, кога токму Коста како капитен прв ги подигна престижните пехари.

Во дресот на португалската репрезентација запиша 50 настапи од 1992 до 2002 година. По крајот на играчката кариера, се посвети на тренерската работа, водејќи неколку клубови во Португалија и странство, но без поголема стабилност.

На функцијата спортски директор на Порто беше назначен неодамна во јуни 2024 година, но судбината не му дозволи да ја реализира визијата за иднината на клубот.

Уште една трагедија: Голман се удави во Португалија додека пливал со својата девојка