Почина Шерика де Армас, која го претставуваше Уругвај на изборот за Мис на светот за 2015 година. Таа имаше само 26 години. Локалните медиуми објавија дека починала минатата недела по двегодишна битка со рак на грлото на матката. Пријателите и семејството ѝ оддадоа емотивна почит на кралицата на убавината, пишува „Њујорк пост“.

Карла Ромеро, сегашната мис на Уругвај истакна дека Шерика „била премногу напредна за овој свет и една од најубавите жени што ги запознала во животот“.

Шерика не влезе во првите 30 на изборот за Мис на светот во 2015 година во Кина, но беше една од само шесте 18-годишни девојки кои се натпреваруваа таа година. Едно списание го пофали нејзиното „прекрасно лице, висина и харизматична личност“ нарекувајќи ја „една од младите надежни таленти на Уругвај“.

„Отсекогаш сум сакала да бидам модел, без разлика дали рекламна манекенка или манекенка на модните писти. Сакам сè што е поврзано со модата и мислам дека сон на секоја девојка е да има можност да учествува на изборот за Мис Универзум како дел од изборот за убавина. Многу сум среќна што можам да го живеам ова искуство со многу предизвици“, изјави таа во интервју за локален медиум.

Надвор од модата, таа продаваше производи за лична нега, шминка и коса преку студиото за убавина „Шеј де Армас“ („Shey De Armas“). Исто така, своето време го посвети на  Фондација „Перез Скремини“ (Pérez Scremini Fondation), која се занимава со деца кои боледуваат од рак.

Ракот на грлото на матката најчесто се јавува кај луѓе постари од 30 години, болеста може да се спречи со редовни прегледи и вакцина против ХПВ.